Отскочна даска: „Разбуди се, нешто се случува“ од Даница Среткоска“

РАЗБУДИ СЕ, НЕШТО СЕ СЛУЧУВА

Разбуди се, нешто се случува, 

немој да кажеш дека не си знаел.

И твојата судбина се одлучува, 

можеби некогаш ќе ти биде жал.

Разбуди се, нешто се случува, 

ќе се кае оној што ова ќе го преспие.

Разбуди се, ноќва нешто вее,

тишината зборува, не се смее.

Чекори нежни одекнуваат,

сенки меѓу соништата патуваат.

Разбуди се, нешто се случува, 

не можам јасно да ти кажам што е, 

ни лагата не е вистина права,

ама чувствувам дека долго ќе трае.

Разбуди се, нешто се крие,

меѓу ѕидови шепот се лие.

Ветрот носи зборови стари,

судбината брои нови удари.

Разбуди се, нешто се случува

ќе плати скапо оној што ќе преспие.

Разбуди се, нешто се случува 

во просторот надвор од нашата волја,

од љубовта некој нѐ спасува 

и ни кажува дека така е подобро.

Разбуди се, часовникот стивнува,

минатото тивко се одзивнува.

Вистината гори, но, не согорува,

судбинскиот тек не се запира.

Разбуди се, нешто се случува 

ќе се кае оној што ова ќе го преспие...