Фотографии кои се премин во паралелен свет кој ретко го посетуваме - „Помеѓу моментот пред и моментот потоа“ на Евангелија Иваноска

На 15. 7. 2025 во Културно информативниот центар во Скопје се одржа отворањето на првата самостојна изложба на Евангелија Иваноска. Таа е графичка дизајнерка, се занимава и со сликарство, а преку оваа изложба ја претставува и нејзината работа како фотографка. Изложбата ќе биде отворена за посета до 4. август 2025 година.  

Иваноска преку својата прва самостојна изложба ни ја посочува нејзината главна фиксација на која целосно ѝ се посветила, а тоа е спонтаноста на моментот кога се доловува во замрзната форма-фотографија. Името на изложбата алудира на тематиката која е проследена во сите дела, а целта е да се овековечи еден момент, пред и по него. Таа нѐ воведува  во нејзината реалност и начинот на кој го перцепира светот околу неа, но со одредена мера на воздржаност и возвишеност. Изборот на црно-бела фотографија е средството преку кое ние сме оддалечени од реалноста, а вклучени во глетката која авторката ни ја прикажува низ својата призма.  Уште еден многу важен детаљ од конципирањето на изложбата е отсуството на имиња до самите дела. Ова е можност да се продлабочи толкувањето на моментите од страна на гледачите чие целосно внимание треба да биде насочено кон набљудување и доживување на визуелното. Покрај тоа, овој потег е индикатор на таа врска меѓу реалноста во која живееме и онаа која ни ја изложува и прикажува Иваноска. 

Со цел добро да се изведат црно-бели фотографии потребно е да се има интензивен контраст, но и драматичност во композицијата, тоа Иваноска беспрекорно го доловува во поголемиот дел на фотографиите. Главно делата се истакнуваат според тоа што има јасно одвојување, меѓу фокусот на предметот во делото кое е најчесто со светли тонови и амбиентот во кој тој предмет постои, кој е почесто со потемни тонови. Дури и главниот фокус да е човек или неколку лица, авторката воопшто не ги следи традиционалните начела и параметри на портретот, во речиси ниту една фотографија погледот на предметот не е усмерен кон гледачот, што уште повеќе ја истакнува спонтаноста. Неконвенционалниот пристап кон фотографирање на луѓе во оваа изложба е токму сижетната линија на темата која се провлекува и ја покажува вештината на Евангелија Иваноска да го скамени моментот кој е највпечатлив и најискрен. Овие фотографии се целосно препуштени на извлекување на кадри од секојдневието со потполна автентичност и природност. Освен самата композијција и контраст, очигледно е присуството на текстура во фотографиите. Без разлика дали станува збор за разиграна вода или лелеаво поле, самиот материјал на нештата околу нас се доловени и истакнати како важни елементи за засилување на реалноста кај сите фотографии. Со оглед на тоа што убавината на овој тип на фотографии е отсуството на огромно премислување пред самото фотографирање, Иваноска успева да направи баланс помеѓу задржување на ликовни елементи кои се квалитетни од технички аспект и тоа да биде природно без чувство на форсирање. 

Оваа изложба не е само дебитантски чекор туку интелектуален манифест кој го провоцира современиот визуелен дискурс. Иваноска го дефинира новиот фотографски јазик каде што тишината ечи погласно од најзвучните бои, вели фотографот Драги Неделчевски во рецензијата за изложбата. Иако станува збор за прва самостојна изложба на Евангелија Иваноска, таа, сепак, со изложените дела ни има покажано огромна пасија кон фотографијата. Таа љубов се има транспонирано во вештина која покажува зрелост во изработката. Изложбата е одличен збир на фотографии кои се премин во паралелен свет кој ретко го посетуваме, а постои и талка меѓу миговите во нашето секојдневје. 

---

Фотографии: Иво Дамјановски и Јане Темелковски // преземени од официјалниот facebook профил на авторката